(1918) Flor d'España
Flor d’España, y flor d’Asturies,
y la flor de l’azucena,
y la flor de los claveles,
y la flor de la canela,
y la flor de Dios, y todu
lo que ye mester que sea
ye la flor del homenaxe
que se fai a gloria plena
en la villa de Avilés
por el rei de la novela;
por Armandu, el gran Armandu,
que arrebalga la frontera
semantandu per Europa
la cultura de mió tierra.
Ye homenaxe nacional
xustamente, como suena,
que la mágica de Orbón
fai andar sobre una rueda.
ye homenaxe de la Patria
que se fai con anuencia
de l’Agusta Maxestaz
del Gobiernu y de la Prensa,
como está pa demostralu
guapamente Su Excelencia
que preside l’homenaxe
por los títulos que ostenta,
los ilustres oradores,
literatos y poetas
que trasvierten toneladaes
de poética elocuencia;
lo seleuto de la xente
que se afaya satisfecha,
y el gaiteru que concurre
con un graniquín de arena,
con el fin de que se pague,
comu manda Dios, la deuda
ya de antiguo contraíoda
con el rei de la novela.
Flor d’España, flor d’Asturies,
flor amorosina y tienra
del rosal de la quintana
de la mió patria la pequeña,
ye la villa de Avilés,
en que ví la rellumera
de la vida, cuando a Dios
i pruyiu enviamee a ella,
convidau a trabayar
com’ un negru de Guinea,
amarrau al duru bancu
del carbayu, de la escuela,
desbravando rapacinos,
que ye bona la tarea.
Así y todu, non me quexu
de mio suerte, que ye perra,
porque tengo por seguru
que ta bien el que crea
que nacer en esta villa
ye tener una prebenda.
Y non pidu más a Dios
que, al tomame Dios la cuenta,
arrecueya en buen llugar
lo que viv’ en mí que allenda,
me reserve un furaquín,
na Carriona, de una tercia;
y un tapín… y nada más…
que me atape… ¡pa que duerma!